Kushtet e përdorimit

1. Kush jemi

GJENO (faqja gjeno.com dhe aplikacioni GJENO, “GJENO”, “ne”) është platformë shqiptare për gjetjen dhe rezervimin online të shërbimeve.

Këto kushte vlejnë për këdo që përdor GJENO: vizitorët, klientët që rezervojnë dhe bizneset që ofrojnë shërbime, bashkë me stafin e tyre. Për bizneset vlejnë edhe pikat 8 deri në 10.

Si i përdorim të dhënat personale e shpjegon Politika e privatësisë; cookies i shpjegon Politika e cookies.

Na shkruaj nga faqja Ndihmë & kontakt.

2. Çfarë është GJENO

GJENO është platformë online ku gjen bizneset dhe profesionistët (berberë, sallone, klinika, palestra e të tjerë), sheh shërbimet, çmimet dhe orët e lira, dhe rezervon takimin. Bizneseve u jep mjete për rezervimet, kalendarin, stafin dhe klientët.

GJENO është ndërmjetës. Nuk e ofron vetë shërbimin dhe nuk është palë në marrëveshjen për shërbimin: kur rezervon, marrëveshja lidhet midis teje dhe biznesit. Biznesi përgjigjet për shërbimin, cilësinë, sigurinë dhe çmimin e tij.

Informacionet e bizneseve (përshkrimi, çmimet, oraret, fotot) i vendosin vetë bizneset. Ne bëjmë kujdes, por nuk garantojmë që janë gjithmonë të plota ose të sakta.

Bizneset e shënuara “Demo” janë shembuj që tregojnë si duket GJENO. Nuk janë biznese reale dhe nuk rezervohen.

3. Llogaria jote

Për të rezervuar ose për të regjistruar një biznes duhet një llogari. E krijon me email-in tënd dhe e konfirmon me kodin që të dërgojmë.

• Duhet të jesh të paktën 16 vjeç. Nëse je më i ri, përdore GJENO vetëm me lejen e prindit ose të kujdestarit.
• Jep të dhëna të vërteta dhe mbaji të përditësuara, sidomos telefonin, që biznesi të të gjejë nëse ndryshon diçka.
• Mbaje fjalëkalimin sekret. Je përgjegjës për atë që bëhet me llogarinë tënde; nëse dyshon se e përdor dikush tjetër, ndërro fjalëkalimin dhe na njofto menjëherë.
• Mos krijo llogari në emër të dikujt tjetër dhe mos hap disa llogari për të anashkaluar kufizimet.

Llogarinë e mbyll kur të duash nga “Llogaria ime” → “Privatësia”.

4. Rezervimet

Kur rezervon, zgjedh shërbimin, ditën, orën dhe, kur biznesi e lejon, profesionistin. Disa biznese i konfirmojnë rezervimet menjëherë, të tjerët i shqyrtojnë vetë. Në çdo rast të njoftojmë kur rezervimi konfirmohet ose refuzohet.

Rezervimi është premtim për të dyja palët: ti vjen në orar, biznesi të pret. Nëse nuk mund të vish, anuloje sa më shpejt, që ora të lirohet për dikë tjetër.

• Anulimi: e anulon falas nga llogaria deri në afatin që ka vendosur biznesi (p.sh. 24 orë para takimit). Pas këtij afati kontakto direkt biznesin.
• Ndryshimi i orës: mund t'i kërkosh biznesit një orë tjetër. Ndryshimi vlen kur biznesi e pranon.
• Mosparaqitja: nëse nuk vjen pa e anuluar, biznesi mund ta shënojë takimin “Nuk u paraqit” dhe mund të vendosë të mos pranojë më rezervime prej teje.
• Anulimi nga biznesi: biznesi mund ta anulojë ose ta zhvendosë takimin për arsye të justifikuara (p.sh. sëmundje ose defekt). Në këtë rast të njoftojmë menjëherë.

Për t'i mbrojtur bizneset nga rezervimet e rreme kemi kufij të arsyeshëm, p.sh. sa rezervime aktive mund të kesh njëkohësisht te i njëjti biznes.

Njoftimet (email, në telefon, në aplikacion) i dërgojmë menjëherë, por arritja e tyre varet edhe nga ofruesit e email-it dhe nga pajisja jote. Statusin e saktë e sheh gjithmonë te “Rezervimet e mia”.

5. Çmimet dhe pagesa e shërbimeve

Rezervimi përmes GJENO është falas për klientët. GJENO nuk merr komision nga klientët dhe nuk mbledh pagesa për shërbimet.

Shërbimin e paguan direkt në biznes, me mënyrat që pranon biznesi. Çmimet i vendos biznesi. Çmimi “nga” ose “sipas kërkesës” do të thotë që shuma përfundimtare varet nga puna që bëhet dhe e bie dakord me biznesin.

Faturën ose kuponin për shërbimin ta jep biznesi, siç e kërkon ligji.

6. Vlerësimet dhe përmbajtja

Pas një takimi të kryer mund të lësh një vlerësim për atë takim, brenda një afati të kufizuar. Vlerësimi shfaqet publikisht me emrin tënd të shkurtuar (p.sh. “Arben K.”) dhe biznesi mund t'i përgjigjet publikisht.

• Shkruaj vetëm për përvojën tënde dhe me të vërtetë.
• Pa fyerje, kërcënime, gjuhë urrejtjeje ose përmbajtje të turpshme.
• Pa të dhëna personale të të tjerëve (p.sh. numra telefoni) dhe pa reklama.
• Pronarët dhe stafi nuk vlerësojnë biznesin e tyre, as konkurrentët.

Mund të raportosh një vlerësim ose biznes që shkel rregullat. E shqyrtojmë dhe mund ta fshehim ose ta heqim; çdo vendim regjistrohet.

Përmbajtja që publikon (vlerësime, foto, përshkrime) mbetet e jotja. Duke e publikuar, na jep leje falas dhe jo-ekskluzive ta shfaqim dhe ta ruajmë në GJENO për aq kohë sa është e publikuar, dhe konfirmon që ke të drejtë ta publikosh.

7. Çfarë nuk lejohet

• Rezervime të rreme ose rezervime për të ngacmuar një biznes.
• Mashtrimi, spam-i ose mesazhet reklamuese pa leje.
• Mbledhja automatike e të dhënave (scraping), robotët ose kërkesat masive pa lejen tonë me shkrim.
• Cenimi i sigurisë: testimi i dobësive pa leje, ngarkimi i viruseve, anashkalimi i kufizimeve ose i kontrolleve të aksesit.
• Imitimi i dikujt tjetër ose i një biznesi.
• Përmbajtje e paligjshme ose që shkel të drejtat e të tjerëve (p.sh. foto pa leje).

Nëse dikush i shkel këto rregulla, mund ta paralajmërojmë, t'i fshehim përmbajtjen, t'ia pezullojmë ose t'ia mbyllim llogarinë. Kur është e mundur, e njoftojmë dhe i shpjegojmë arsyen.

Nëse gjen një problem sigurie, na e trego privatisht nga Ndihmë & kontakt. Faleminderit!

8. Bizneset: llogaria, profili dhe rezervimet

Kush regjistron një biznes konfirmon që ka të drejtë ta përfaqësojë. Pronari fton anëtarët e stafit dhe u cakton rolet; veprimet e tyre në panel quhen veprime të biznesit.

Biznesi përgjigjet që profili të jetë i saktë dhe i ligjshëm: emri, adresa, vendndodhja në hartë, shërbimet, çmimet, oraret, fotot dhe ofertat. Fotot dhe tekstet duhet t'i ketë të vetat ose me leje.

Biznesi duhet të ketë lejet dhe licencat që kërkon ligji për veprimtarinë e tij dhe u jep klientëve faturë ose kupon fiskal sipas ligjit.

Biznesi i respekton rezervimet e konfirmuara. Nëse duhet të anulojë ose të zhvendosë një takim, e bën sa më herët dhe me arsye; GJENO e njofton klientin automatikisht.

“I verifikuar” do të thotë vetëm që GJENO ka shqyrtuar dokumentet që ka dorëzuar biznesi. Nuk është licencë, certifikim ose garanci cilësie dhe hiqet nëse dokumentet rezultojnë të pasakta.

Vendosjet e sponsorizuara shënohen gjithmonë “Sponsorizuar” dhe nuk ndryshojnë renditjen e rezultateve të zakonshme.

9. Bizneset: planet dhe pagesat

Plani Free është falas dhe pa afat. Planet me pagesë japin funksione shtesë; çmimet dhe çfarë përfshin secili plan janë te Për bizneset.

• Abonimi paguhet paraprakisht, për një muaj ose një vit, me transfertë bankare sipas faturës që lëshon GJENO. Nuk ka tarifim automatik dhe nuk ruajmë të dhëna kartash.
• Plani aktivizohet ose vazhdon kur konfirmojmë pagesën. Para mbarimit të periudhës të dërgojmë faturën për periudhën e radhës.
• Nëse pagesa nuk vjen, plani vazhdon edhe disa ditë dhe pastaj biznesi kalon në planin Free. Të dhënat nuk humbasin; çaktivizohen vetëm funksionet me pagesë.
• Abonimin mund të mos e rinovosh kur të duash: vlen deri në fund të periudhës së paguar. Pagesat për periudhat e filluara nuk kthehen, përveç kur e kërkon ligji ose kur shërbimi nuk është ofruar për fajin tonë.
• Prova falas dhe ofertat e nisjes vlejnë sipas kushteve që shfaqen kur aktivizohen.
• Çmimet mund t'i ndryshojmë për periudhat e ardhshme, duke të njoftuar të paktën 30 ditë përpara. Periudha e paguar nuk preket.

10. Bizneset: të dhënat e klientëve

Kur një klient rezervon përmes GJENO, biznesi merr emrin, telefonin, email-in dhe shënimin e tij. Biznesi i përdor vetëm për takimin dhe për marrëdhënien me atë klient, dhe përgjigjet për to si kontrollues i pavarur, sipas ligjit për mbrojtjen e të dhënave personale.

Biznesi nuk i përdor këto të dhëna për reklama ose mesazhe marketingu pa pëlqimin e klientit, nuk ua jep të tjerëve dhe nuk i përdor për qëllime të tjera.

Për të dhënat që biznesi ruan vetë në panel (lista e klientëve, shënimet, etiketat, rezervimet që shton vetë), biznesi është kontrollues dhe GJENO përpunues. Për këto të dhëna GJENO:

• i përpunon vetëm për t'i ofruar biznesit funksionet e panelit dhe sipas udhëzimeve të tij;
• i mban konfidenciale dhe ua lejon aksesin vetëm personave që kanë nevojë dhe që janë të detyruar të ruajnë konfidencialitetin;
• i mbron me masa teknike dhe organizative të përshtatshme (enkriptim gjatë transmetimit, kontroll aksesi, regjistër veprimesh);
• përdor vetëm ofrues të besueshëm të llojeve të listuara te Politika e privatësisë; emrat ia jep biznesit me kërkesë dhe e njofton kur ndryshojnë;
• e ndihmon biznesin t'u përgjigjet kërkesave të klientëve (p.sh. për kopje ose fshirje) dhe e njofton pa vonesë për çdo cenim sigurie që prek këto të dhëna;
• kur biznesi mbyllet, i fshin ose i anonimizon brenda 90 ditëve, përveç atyre që ligji kërkon të ruhen.

Biznesi garanton që ka bazë ligjore për të dhënat që fut vetë në GJENO (p.sh. klientët që i ka pasur edhe më parë) dhe që i ka informuar klientët e tij.

11. Pronësia intelektuale

Emri GJENO, logoja, dizajni, tekstet dhe kodi i platformës janë pronë e GJENO-s ose e licencuesve të saj. Nuk lejohet kopjimi, ndryshimi ose përdorimi i tyre pa leje, përveç përdorimit normal të platformës.

Bizneset mund ta përdorin logon GJENO dhe posterin me kodin QR që krijojnë në panel për të promovuar profilin e tyre në GJENO.

12. Disponueshmëria dhe ndryshimet e shërbimit

Punojmë që GJENO të jetë gjithmonë në punë dhe i sigurt, por mund të ketë ndërprerje për mirëmbajtje, defekte ose probleme te ofruesit tanë (hostimi, email-i, rrjeti). Për ndërprerjet e planifikuara përpiqemi të njoftojmë më parë.

GJENO zhvillohet vazhdimisht: mund të shtojmë, ndryshojmë ose heqim funksione. Nëse heqim një funksion kryesor të një plani me pagesë gjatë periudhës së paguar, ofrojmë një zgjidhje të njëvlershme ose kthim të pjesshëm të pagesës.

13. Përgjegjësia

GJENO nuk përgjigjet për shërbimin që ofron biznesi (cilësia, siguria, rezultati, çmimi), për sjelljen e klientëve ose të bizneseve, as për mosmarrëveshjet midis tyre. Ankesat për shërbimin i drejton fillimisht te biznesi; ne mund të ndihmojmë që të merreni vesh.

Nuk përgjigjemi për dëme të tërthorta, si fitimi ose klientët e humbur, që vijnë nga përdorimi ose pamundësia e përdorimit të GJENO-s.

Për bizneset, përgjegjësia jonë e përgjithshme kufizohet në shumën që biznesi na ka paguar në 12 muajt e fundit.

Asgjë në këto kushte nuk e kufizon përgjegjësinë tonë për dëmet e shkaktuara me dashje ose nga pakujdesia e rëndë, as të drejtat që të jep ligji për mbrojtjen e konsumatorit.

14. Pezullimi dhe mbyllja

Llogarinë e mbyll kur të duash. Para se të mbyllë biznesin, biznesi i njofton klientët për takimet e ardhshme ose i anulon ato.

Ne mund ta pezullojmë ose ta mbyllim një llogari ose biznes që shkel këto kushte ose ligjin, që rrezikon sigurinë e të tjerëve, ose kur na e kërkon një autoritet. Për shkeljet jo të rënda japim më parë mundësinë që të rregullohen.

15. Ndryshimet e këtyre kushteve

Mund t'i përditësojmë këto kushte kur ndryshon GJENO ose ligji; data e versionit të fundit është lart. Për ndryshime të rëndësishme të njoftojmë me email ose në aplikacion të paktën 15 ditë para se të hyjnë në fuqi, dhe 30 ditë kur prekin planet me pagesë.

Nëse nuk je dakord, mund ta mbyllësh llogarinë para se ndryshimet të hyjnë në fuqi. Nëse vazhdon ta përdorësh GJENO, i pranon kushtet e reja.

16. Ligji dhe mosmarrëveshjet

Këto kushte rregullohen nga ligji i Republikës së Shqipërisë.

Nëse ke një problem, na shkruaj së pari: shumicën e rasteve i zgjidhim shpejt dhe pa kosto. Nëse nuk gjejmë zgjidhje, mosmarrëveshjen e zgjidh gjykata kompetente në Shqipëri. Si konsumator ruan të gjitha të drejtat që të jep ligji, përfshirë ankesën te autoritetet për mbrojtjen e konsumatorit.

17. Kontakti

Na shkruaj nga faqja Ndihmë & kontakt.